中環出更：高偉國睇好中國鐘錶市場
由香港表廠商會、廣東省鐘錶協會同深圳市鐘錶行業協會合辦嘅粵港鐘錶研討會，日前喺深圳福田舉行，唔少香港鐘錶業界代表均有出席。表廠商會會董高偉國喺會上踴躍發言，同大家分享世界經濟同鐘錶發展嘅密切關係。
高偉國話，現時全球經濟處於放緩狀態，已發展國家正面臨國債危機及消費力下滑，經濟復甦能力非常之低，對消費品嘅需求大幅下跌。雖然新興市場面臨房地產泡沫同匯率浮動嘅問題，但佢話消費品需求不減反增，完全能夠彌補已發展國家供過於求嘅問題。
打造Made in China品牌
高偉國又話，要發展好一個行業，必須要有長遠目光，喺經濟比較疲弱嘅時候，發掘一下唔同地方嘅發展潛力。佢分析，香港、中國、越南同中東地區嘅鐘錶市場潛力大，特別係中國作為一個鐘錶生產同銷售量高企嘅國家，建議大家不妨集中開拓生意。但佢強調，業界共同發展嘅目標唔係要鬥平，而係要做出有質量嘅手錶，打造「Made in China」成為一個品牌喎。