中環出更:戴尚蓮拍片宣揚素食主義

社交名人李桂蘭(Olivia)每次去Ball,靚衫換不停,但講到飲食,就返璞歸真,跟千金戴尚蓮(Shelley)齊食素。Shelley比媽媽更嚴格,戒肉戒蛋戒奶,畀人笑佢好怪,但佢卻樂做「素食大使」,還花三年時間拍下紀錄片「PLANEAT」,走遍歐美及香港,宣揚素食萬歲。

Shelley尋晚喺演藝搞首映,城中名人紛紛到賀。畢業於牛津大學英國文學系嘅Shelley,四年前開始茹素,媽咪擔心佢無營養,不大贊同。沒想到,幾個月後,全家都減少食肉,三哥Miles及男友James Perkins更效法食素。

Shelley一向為食,最愛食叉燒、牛扒同燒鴨,但經常感到胃氣脹,但茹素後,問題大為改善。佢更發現,食素有助減少溫室效應,更環保。食素並不單調,Shelley四出發掘素食餐廳,因而結識大班素食廚師,不時交流綠色食譜,樂在其中。

獲保羅麥卡尼激讚

三年前,佢執導拍攝以素食為題材嘅紀錄片。由於經費欠奉,惟有與友人成立製作公司,以收入支持夢想。今年初,作品大功告成,獲美國及英國各大電影節賞識,邀請佢參展。就連披頭四樂隊成員之一嘅保羅麥卡尼(Paul McCartney)都捧場,大讚「PLANEAT」拍得有啟發性。

首映禮上,Shelley姨媽李麗娟都被影片打動,媽打話由下月開始,每逢周一會食素。前「滙豐一姐」王以智都支持素食,每日三餐只有中午食肉。不過,九巴後人雷禮權就唱反調,坦言最憎食菜同生果,每日啪維他命丸補番數喎。

卓妮

「Money18免費即秒股票報價網站」現推出8升級功能,財經資訊,實時實發!