每逢星期三，港鐵為長者提供二元任搭優惠。碰啱昂坪360十二月又提供長者以及兒童優惠，全月免費搭纜車。好嘞，假如你係上咗年紀嘅老友記，你會唔會趁此大好良機去東涌遊山玩水？你知啦，大嶼山天壇大佛聞名中外，心經簡林又別樹一幟，人一世物一世點都要去見識見識，畢竟人生苦短，晚境之年好好享受一下明媚風光完全唔過分。
點不知，死火嘞，一大班長者尋日呼朋結伴浩浩蕩蕩去到東涌，一睇通告，幾乎暈低。東涌纜車站嘅通告係咁講嘅，是日維修，暫停服務。喂，人哋公公婆婆叔叔嬸嬸山長水遠搭港鐵去到東涌，你粒聲唔出就話停駛，玩死人咩！
嗱嗱嗱，尋日東涌就上演咗一幕正正式式嘅「發老脾」，一眾老友記脾氣一發不可收拾，異口同聲齊齊鬧爆昂坪360，評語包括「玩老人家兼縮骨」以及「唔想免費就唔好搞啦」等等。
計功夫茶話齋，昂坪360又確係縮骨到冇朋友。你明知每逢星期三港鐵為長者提供二元任搭優惠，你又明知東涌纜車今個月免費優待老人家，你更加明知港產長者特別精打細算，處世哲學係慳得一蚊得一蚊，你有乜可能會揀星期三維修先？咁嘅縮骨行為擺明係欺負老人家啫！
再講吖，唔止港產長者條氣唔順，外地遊客一樣非常冇癮，好多人都係去到東涌先至知道一場歡喜一場空，興致勃勃想搭纜車竟然摸門釘。你知啦，遊客簡直係香港嘅運財童子，你咁招呼不周好容易造成趕客效應o架咋。
因乜事幹適逢優惠竟停駛？昂坪360點解要鬼鬼祟祟維修呢？佢哋話喎，唔係鬼鬼祟祟o架，事前已經喺網上發放消息，而且早一日通知咗傳媒。
唉，網上發放消息呢家嘢，亦係欺負老人家嘅行為。好多公公婆婆叔叔嬸嬸連電腦係乜東東都未必知，點可能透過上網而知道閣下維修停駛？即使活到老學到老識得上網，又未必會事前做足功課。就好似你搭港鐵咁吖，唔通你出門之前會上網睇一睇港鐵有冇甩轆？唔好玩啦！
至於早一日通知傳媒，呢個做法當然唔夠，正常人睇報紙未必會留意到豆腐膶咁細嘅篇幅，何況傳媒唔係老奉幫你發放消息啫。點樣先至足夠呢？嗱，咪話功夫茶唔醒你，昂坪360大可以喺《東方日報》同《太陽報》落廣告，半版又好，全版更佳，咁就包保任何消息都可以街知巷聞。原因好簡單，《東方日報》銷量全港第一，雙劍合璧加上《太陽報》咯喎，讀者群超過五百萬，涵蓋全港七成半人口。你話嘞，喺兩報落廣告點會睇漏眼！