中環出更：盧永仁睇好美國紅酒
近年美國加州紅酒冒起成為酒壇「新貴」，日前有團體搞咗個慈善晚宴，用加州一級酒莊靚酒配中國菜，吸引唔少名人前來品嘗美酒佳餚。恒基地產副主席李家誠伉儷、足球總會董事余錦基伉儷及兒子余仲行、香港大學副校長錢大康伉儷、鋼鐵大王龐鼎元孫仔龐建貽、富士攝影器材主席孫大倫嘅大仔孫道弘都有出席。
錢大康話自己有段時間因為駐美工作嘅關係，經常都有機會歎到Napa等美國靚酒；而出咗名愛紅酒嘅廣管局成員盧永仁（William）就話，加州紅酒咁受歡迎，係因為當地長年夠「曬」，喺日照充足下，氣候同土壤能種出甜美嘅葡萄，釀製嘅葡萄酒味道亦會較濃，而且品質較為平均，每個年份嘅酒味都唔會差太遠。
若以投資角度來說，William話暫時仲係買法國酒好啲，好似布根地、波爾多等酒莊，頗受中國、俄羅斯及中東等地歡迎。不過，法國酒近年價格已經升到見頂，仲開始有跌價嘅迹象，反觀美國酒升值潛力大，只係大家仲未發現佢嘅優點啫，好似當晚嘅Screaming Eagle、Colgin Cellars、Harlan Estate較為罕有，未來五至十年內必有市場喎。