政情：阿人同食人肉劃清界線
近期有齣大熱嘅電視劇集論盡本港政治生態，劇中藝人林保怡飾演嘅工運領袖，造型似足職工盟立法會議員李卓人，拍住劉丹飾演嘅疑似劉千石搵食。阿人話，好多朋友叫佢睇呢齣戲，仲建議佢邀請林保怡出席稍後舉行嘅工黨成立典禮。不過，當阿人知道林保怡喺劇中連朋友嘅肉都食時，即刻打咗個突，仲耍手擰頭話：「我無食過！」
阿人話，自己只係睇過一、兩集該劇，但發現劇中嘅工會環境，同職工盟一樣咁惡劣，所以齣劇都算幾真實。不過，阿人坦言，喺呢個時候推出呢齣劇，真係幫到工黨製造話題，因為至少可以話畀公眾聽，工會係幫到工人嘅。阿人仲估計個編劇有可能係職工盟會員，因為該電視台嘅工會都係職工盟屬會，好有可能係個編劇有感而發喎。