政情：高官趁黃金個半鐘拉票
每逢星期三立法會大會期間，好多政府高官都會趁住議員雲集嘅機會，去到議員前廳同議員吹水或游說議員支持政府政策等。不過，自從立法會搬到添馬艦後，唔開會嘅議員多數返回樓上辦公室開工，除咗令前廳嘅熱鬧情況不復再外，更令班高官好閉翳，皆因好難向議員拉票。不過，你有張良計，我有過牆梯，原來高官已經諗到計。
話說尋日大會開始咗無耐，商務及經濟發展局常秘黃灝玄突然現身議員前廳，同議員談笑風生，令人十分好奇。一度同黃灝玄坐喺梳化密斟嘅立法會議員張文光透露，原來政府高官深知議員已經甚少蒲前廳，於是依家識得把握早上十一點至十二點半呢段黃金時間，諗住呢段係質詢時間比較齊人，可以畀佢哋落前廳搵議員打招呼。
至於點解議員質詢時段會齊人啲呢？張文光就分析，因為唔少議員可能想跟進質詢，所以會留喺前廳（目及）住會議，以便想講嘢嘅時候可以即刻返回會議廳。就係咁，造就咗呢個時候有較多議員喺度，難怪一啲平時少見嘅政治助理，近期每到周三朝早都會現身立法會喇。