政情：周日揀選委 「貓紙」盡出
選舉管理委員會（選管會）喺主席馮驊領導下接二連三出醜，區議會「種票」風暴浪接浪，除有落選者考慮選舉呈請外，即將舉行嘅特首選舉委員會選舉亦傳出不滿聲音，唔少候選人同選民都對投票安排怨聲載道，因為選票設計唔畀印團體標誌及政治聯繫，搞到建制派同泛民主派嘅參選人亂晒龍，最終要向選民派發「貓紙」同卡片做投票參考，真係畀選管會玩殘。
有份選出特首嘅一千二百個選委將於周日產生，據聞各大陣營對選管會冇改善投票安排都心中有氣，為免所屬支持者投錯票益咗對家，佢哋惟有自求多福，不約而同減少派發選舉廣告，反而集中火力向所屬選民派發「貓紙」卡片。就以飲食界為例，由自由黨張宇人牽頭嘅十七人名單，及餐飲聯業協會會長黃家和支持嘅「星火行動」，都有印製載有參選人姓名同編號嘅卡片。
泛民作詩橋行唔通
至於法律界方面，由律師會理事熊運信組成嘅十六人名單，則喺選舉廣告單張中附有可撕走嘅推薦名單，等大家帶去投票時參考。另一邊廂，泛民方面亦打算一卡在手，就可以暢通無阻。立法會議員張文光坦言，以往選委會投票前，佢哋都會作首詩等大家記住去投票，但依家參選人眾多，就算古詩都寫唔晒所有候選人，所以佢呼籲大家要攜帶泛民張卡片去投票喎。
至於搞到各大陣營要變陣派卡片嘅幕後黑手馮驊，尋日同傳媒介紹當日投票安排時死不認錯，反警告選民帶卡片入投票站時，切勿公開展示卡片，否則就會違法，佢又反建議選民最好就係帶選舉事務處嘅候選人名單入去投票，因為呢張名單並非選舉廣告喎。唔知馮驊講呢番說話時，有否想過點解選民要帶卡片入投票站呢？歸根究柢咪係選管會唔准喺選票上印有團體標誌及政治聯繫畀選民識別囉！