政情：KK唔夠票選超級議席
距離明年立法會選舉唔夠一年，相信各黨派已經密鑼緊鼓，諗計部署參選，而最矚目嘅莫過於新設嘅超級區議員議席。環顧立法會各黨派，攞到十五個區議會議席「入場券」嘅，不外乎民建聯、民主黨、工聯會及民協，但睇真啲原來民協根本唔夠票提名自己友參選。
超級區議會議席嘅提名門檻要十五位民選區議員，按此推論，喺今屆區選中，贏到十五席嘅民協絕對有能力提名一個人參選。不過，最近有政界中人就發現，原來報名參選超級區會議席，係唔可以自己提名自己嘅，換言之民協想搵人參選嘅話，最少搵多一個「外援」先至夠提名參選。
據聞民協嘅如意算盤，係屬意立法會議員馮檢基（KK）明年落場爭超級區會議席，而九龍西直選個位就交由黨友譚國僑頂上，期望全取兩個議席。不過，譚國僑啱啱喺深水埗區議會選舉中落敗，人氣大打折扣，真係要睇吓佢哋未來一年點部署喇。不過，KK就話要先諗掂特首選舉，尋日佢仲發探訪通知，喺星期四（八日）正式宣布參選特首。