政情：天氣女神畀天氣玩殘
天氣女神黃婉曼尋日以青年創業大使身份分享佢創業之後又蝕錢嘅往事，雖然當年蝕錢，佢仍然鼓勵年輕人創業。
黃婉曼話開士多舖係佢嘅童年夢想，當年佢入住新亞書院學思樓，就試過經營合作社，諗住好似啲老闆娘咁悠閒收錢印印腳。不過一年之後，埋單計數發覺根本無錢賺，猶幸只係賠咗幾百蚊啫。另一次黃婉曼就投標校內嘅大笪地賣串燒，為咗要有良好業績，親自入貨之餘又打聽埋新疆燒烤嘅秘方，仲送埋飲品作招徠添，可惜人算不如天算，本來客似雲來嘅生意突然風雨來襲，惟有馬上割價傾銷，結果好幸運咁賺得一蚊而不致賠本收場。
為鼓勵年輕人創業，青年議會主辦創業型人比賽，勝出者有機會獲得十五萬創業資金，黃婉曼同星之子陳奕希呼籲年輕人要把握實現夢想嘅機會。對黃婉曼嚟講，雖然創業之路唔係咁順暢，但佢深信，唔想夢想變空想，就要多行一步，只有勇於嘗試至有無限機會喎。