政情：自由黨卡片 黨徽用通花
自由黨喺今年區議會選舉收復中西區山頂失地，兼夾贏得多個議席，顯示經過幾年嘅改革漸見成績，除咗培訓出一批青年生力軍外，今年初更重新設計嶄新嘅黨徽示人。
田少莎姐質地唔同
相信大家都知該黨嘅新黨徽係由兩個藍色同綠色圓環緊扣而成，但最近我哋見過榮譽主席田北俊同副主席「莎姐」周梁淑怡嘅卡片，原來個黨徽仲有革新嘅通花設計，而且兩人嘅卡片仲係唔同質地添！
莎姐張卡片都係以一般質地印製，但田少嗰張就好薄身，感覺輕飄飄，一陣微風都吹得起。田少話，其公職同身份比較多，除咗袋住自由黨卡片外，仲有旗下公司及旅遊發展局主席張卡片，如果以一般厚身紙質印製，重量都幾係嘢，所以佢選擇較薄嘅質地。不過，不得不提係田少間公司「萬泰」嘅卡片，雖然同樣係薄質設計，但就好似十元紙幣咁以塑膠製造，唔怕濕水，亦唔怕風雨。