政情：項明生燒鬚唔識用iPad
Sony Computer Entertainment Hong Kong Ltd董事總經理項明生（James）由VCD機嘅PS，到依家搞藍光PS3，仲做埋首位華人總經理，係不折不扣嘅潮人典範，不過佢尋日竟然差啲被一部iPad考起。
話說尋日James同幾位網民力量嘅成員開記者會公布一個民調結果，幾位電腦奇才影合照時，一人拎住一部iPad，啱啱好砌成「網民力量」四個字，但唔知點解，James嗰部iPad特別暗，於是記者就問James可唔可以將部iPad個顯示屏校光啲，點知James拎住部個設計簡約，出名易用，成部機得一個掣嘅iPad顯得好不知所措，搵嚟搵去都搵唔到喺邊度可以校光亮度。
其他網絡力量成員見James咁迷惘個樣，都即刻去落手幫佢啦，點知佢哋四個都搞唔掂，最後仲要搵公關求救添。