政情：CY助選班底再添猛將
疑似特首候選人梁振英（CY）將於下周日下午喺灣仔會展舊翼宣布參選，同時更多梁營助選人員亦陸續曝光，據聞人稱「麥Sir」嘅政府新聞處前助理處長麥國華，將加入梁營主責同傳媒溝通工作。眾所周知，麥Sir喺退休前同各大傳媒關係良好，亦熟悉傳媒運作，相信有助CY將治港理念順利傳遞開去。
王冬勝挺唐 葉劉循序進
另一名疑似特首候選人唐英年過去兩日都冇公開活動，但已自動當選金融界選委嘅滙豐亞太區行政總裁王冬勝，突然開腔表態支持唐唐做下屆特首。原來佢曾經多次同唐唐談及香港金融發展，覺得唐唐嘅策略比較清晰，有利香港長遠發展喎。
講番CY，尋日同新民黨主席葉劉淑儀一齊出席專上教育政策評議會嘅論壇，CY被問及其理念係咪得到商界認同時，佢話自己喺商界有好多支持者，會繼續爭取各界支持。正慎重考慮參選嘅葉劉淑儀，則首次透露會循序漸進準備參選工作，至今已經有十日時間出席論壇同接觸選民喎。