政情:林鄭撐建制派過晒界

發展局局長林鄭月娥出席公開場合時,無啦啦講大咗撐建制派,佢話對於近日有批評指民建聯靠「蛇齋餅糉」爭選票返嚟係矮化咗佢哋扎根社區嘅成果,仲話佢自己作為選民都唔可以接受。林鄭講到過咗界,勢必招惹其他政黨爭風呷醋,真係自己攞嚟煩。

林鄭尋日應邀出席民建聯喺九龍灣商場Megabox舉行嘅啟德方案展覽,佢致詞時突然好感觸咁話,上星期嘅區議會選舉令佢有感而發,話民建聯等幾個團體就啟德新區嘅發展做咗成年研究,單單佢親身同該黨開會已不下三、四次,因而「盛讚」佢哋取得地區支持係靠實力,話佢哋靠「蛇齋餅糉」當選係矮化咗佢哋扎根社區嘅成果,「我自己作為選民亦唔可以接受。」

林鄭之後仲細心欣賞展覽嘅模型,不過唔知係咪醒覺自己已經講多咗,一向好肯面對記者嘅佢喺儀式結束後速逃,完全冇回答記者提問。

「Money18免費即秒股票報價網站」現推出8升級功能,財經資訊,實時實發!