政情：克林頓現身中環賞維港
前美國總統克林頓尋日以私人身份到訪香港，全程有多位保鏢隨從喺旁邊瞄到實。尋日陽光普照，氣溫和暖，略為清減嘅佢早上喺中環港外線碼頭附近散吓步，欣賞吓維港景色，一邊聽同行人士講解，似乎幾寫意。冇幾耐，有遊客同市民認得出佢，紛紛拎起相機、手機影相。
克林頓對上一次訪港，係○八年嘅時候，出席由佢發起嘅「克林頓全球行動」首次亞洲會議，旨在解決當時全球最急切要解決嘅問題。克林頓亦曾經喺○五年旋風式訪港，為佢本自傳《我的生活》（My Life）舉行簽名會。
克林頓上個禮拜出版咗第三本新書《返回工作崗位》（Back to Work），主題講美國金融危機，書入面批評現任總統奧巴馬對華爾街太過嚴苛。唔知今次來港，佢會唔會趁機同大家宣傳吓新書呢？