政情：林建岳挺唐甩轆尷爆
特首選舉委員會選舉呢啲小圈子遊戲，向來都係圍威喂協調名單參選，所以好多都自動當選，雖然係咁，但係人係鬼都要搞得認真啲、仔細啲，否則搞到甩轆，真係笑大人個口。話口未完，麗新發展主席林建岳就表演甩轆畀大家睇，佢日前組成嘅十五人娛樂圈參選名單中，竟爆出黎明退選，原因係佢未登記成為選民，所以無資格參選，要改由周星馳代替，真係夠晒詼諧。
林建岳同疑似特首候選人唐英年嘅關係千絲萬縷，回想唐唐做緊財政司司長嘅時候，林建岳曾經出動私人飛機載唐唐歐遊，可見兩人分屬老友。依家唐唐疑似選特首，林建岳就拉埋譚詠麟、黎明同黃百鳴等娛樂圈中人，約埋喺上星期三報名參選，似乎想打造星級選委名單。可惜當日唔見黎明現身，令各方疑團四起，究竟黎明因咩事唔蒲頭呢？
謎底終於喺尋日解開，原來黎明一直以來都冇登記成為選委會演藝界選民，所以冇資格參選之餘，連投票選選委都唔得。啱啱由紐約返港嘅黎明坦言，自己冇資格參選，佢話：「自己唔係選民，何來有資格做選委，可能中間出現美麗誤會！」被問到係咪唔想參與政治時，喺娛樂圈中外號「金句王」嘅黎明就話：「唔想因為黎明影響普羅大眾睇法！」
搵周星馳頂上
既然黎明冇得選，總要有人取而代之，為咗維持呢張名單嘅星光熠熠指數，取代黎明嘅人竟然係周星馳，真係估佢唔到。老實講，如果組名單參選係為咗幫某位疑似特首候選人嘅話，如今鬧出笑話一則，貽笑大方不在話下，隨時會幫倒忙添！
另一邊廂，已報名循醫學界選委參選嘅李家仁醫生，尋日去信提醒傳媒，暫時唔好再播佢嘅歌、錄影或者訪問等，費事違規喎。原來選委會選舉活動指引的確寫明，候選人應該盡量避免喺節目亮相，搞到「小明」要暫別大家。話時話，黎明唔選都未必係壞事，藝人工作根本就係要爭取曝光，但依家就唔使因為參選而少咗機會出鏡啦！