政情：林D9出醜 G4遮唔住
尋日係百年一遇嘅好日，一一年十一月十一日「六條一」，新任政務司司長兼署理特首林瑞麟（林D9），選擇喺呢個好日奉獻第一次，出席立法會內務委員會特別會議舌戰全體議員，好似信心十足咁，但係就畀人發現喺林D9身後，居然坐咗個警方保護要人組（G4）貼身保護佢，好似預咗佢一定會畀人掟嘢襲擊咁。不過G4保得住佢嘅人身安全，就保唔到佢唔講錯嘢，一向以政治正確同背書出名嘅林D9，竟然連有幾多位立會議員身兼港區人大代表都數錯咗，老貓燒鬚。
林D9一入場，佢嘅G4已經亦步亦趨、緊隨其後，大模廝樣坐喺官員席第二排近走廊位置，疑似係準備一旦有咩突發事情發生，可以第一時間衝出去護主。政府方面則解釋，因為林D9尋日身兼署理特首，所以依例要派G4保護，具體坐邊則係立法會秘書處嘅決定，否認林D9驚青怕畀人打。不過，秘書處就話政府好遲先通知佢哋話要有G4在場，因此先臨時決定畀佢坐喺林D9後面，將來點做會再研究。
所謂好嘅開始係成功嘅一半，林D9第一趟以司長身份出席特別內會，理應準備充足，表現得好好睇睇。可惜無論議員問佢嘅老本行有關國家十二．五規劃嘅問題，定係由佢做主席嘅關愛基金籌款進度，林D9都係陳腔濫調、新意欠奉，成功捍衞「人肉錄音機」呢個外號。
輪到社民連立法會議員長毛梁國雄提問，林D9就出醜喇。長毛首先問林D9知唔知有幾多位議員身兼港區人大代表，然後質問其他問題，點知問到一半就畀林D9打斷，胸有成竹咁舉手大叫「咪住」，並反寸長毛雖然佢唔係出席「梁國雄問答遊戲比賽」，不過佢都可以照答，答案就係四個！長毛一聽到林D9咁答，即時露出勝利笑容，話「咪住？你錯啦！」實情答案係五個至啱，包括自由黨劉健儀、經濟動力梁劉柔芬、專業會議何鍾泰、工聯會黃國健同民建聯葉國謙。長毛之後問林D9幾多位議員身兼全國政協委員，不過呢次輪到長毛自己甩轆，數漏咗「五散人」成員林大輝，搞到大輝即時擰轉身，遞張印有政協職銜嘅卡片畀長毛。
冇人掟嘢冇屈人 悶親G4
長達個半鐘嘅特別內會話咁快就結束，結果冇人掟嘢、冇人爆粗、冇人被屈黑社會，連G4都悶到中途離場聽電話，唔知係咪同人民力量及社民連剛於區選中大敗，令長毛同黃毓民冇晒心機掟嘢有關呢？不過正正因為冇人掟嘢，令林D9冇機會發威第N次譴責議會暴力，嘥晒「六條一」呢個百年一遇嘅好日子。