政情：范太葉劉較量冇火花
兩位有意參選下屆特首嘅全國人大常委范徐麗泰同立法會議員葉劉淑儀，昨日一齊出席教評會嘅座談會。正當所有人以為兩太同場較量，一定會擦出火花嘅時候，兩人就出乎意料地合拍，梗係喇，兩太都喺聖士提反女子中學畢業，畢業嘅年份相差五年，佢哋之後都係升上港大，有校友嘅情誼。
喺座談會上，有學生問到通識科係咪需要改革，葉劉搶答話通識科唔應該計分，應該改為合格或者唔合格，令學生唔使咁大壓力。范太同意葉劉嘅講法，話通識科搞到學生同老師都唔開心，叫政府唔好成日紙上談兵，對教育界太多要求喎。講到學生面對好多壓力，范太就話自己細個淨係打吓波、唱吓歌咁，無依家啲學生咁多嘢做，葉劉都話細個嗰陣都唔使好似依家嘅學生咁讀咁多嘢。兩太後來仲一齊見記者，由頭到尾都咁和諧。
吳康民料范太唔參選
前港區全國人大代表吳康民尋日傍晚出席一個活動時話，中央在目前未有勸退任何人士，但佢相信范太最終唔會參選︰「范太一時話出，一時話唔出，反反覆覆令佢失分，我相信最後佢唔去。」