中環出更：彭芷君撐青聯 港加兩邊走
早排舉家移居加拿大嘅香港青年聯會副主席彭芷君（Gigi），日前為咗青聯活動現身香港，佢時不時要返香港同內地，實行港、加兩邊走，真係少啲精力都唔得。難得佢咁頻撲依然神采飛揚，確係現代能幹女性嘅典範。
Gigi係港協暨奧委會秘書長彭冲囡囡，相信好多人都知，但原來佢老公辛光耀來頭都唔小，係心胸外科專家，原本任教於中文大學醫學院，早排被加國多倫多綜合醫院挖角去肺移植中心做研究。肺移植技術被視為一間醫院綜合實力嘅衡量標準，可見辛光耀做緊嘅研究有幾咁重要。Gigi話，老公嘅研究計劃為期兩年，到時佢哋一定會返嚟，將所見所學貢獻番畀自己嘅地方。
帶隊參觀東江水
為咗畀老公專心做研究，Gigi暫別香江，帶埋分別兩歲及五歲嘅小朋友一齊移居加國。不過，佢好掛住青聯一班兄弟姊妹，每兩個幾月就飛返港一次。早排佢啱啱以廣西青聯副主席身份，安排約廿位青聯好友去廣西參加「同飲一江水」嘅環保之旅，參觀香港人飲用嘅東江水上游，認真有心。