中環出更：大舊石開小差 掃半打香檳王
多位立法會政治明星落敗區議會選舉，反映從政呢條路認真艱難。不過，對於立法會議員石禮謙（大舊石）嚟講就無有怕，事關尋日立法會會議期間，大舊石照樣溜出去，由金鐘添馬艦到中環買香檳，一心二用，參選功能界別嘅佢真係定過抬油。
大舊石一向嘴刁，閒來愛出入高級餐廳，講到飲酒，絕不求其。尋日晏晝三點幾，卓妮撞見佢同友人葉律師買酒，目標係置地廣場旁邊商場一間酒窖。大舊石推門入去，職員熱情地招呼，傾唔夠五分鐘，大舊石就「科水」畀錢，隨即急急腳走人。
酒窖職員馬上追出去，原來大舊石買酒買到忘晒形，留低咗一袋私人物品。問大舊石買乜酒咁high？佢笑笑口話：「無嘢，嚟睇吓啫！」可能醒起要返立法會「交人」，馬上轉身走人。
每支盛惠1228元
卓妮八到，大舊石其實睇中一支Dom Perignon 2002香檳，每支盛惠一千二百二十八元，佢一口氣買六支，畀咗七千三百幾蚊，吩咐司機稍後去攞。
Dom Perignon被譽為「香檳王」，2002年呢支係產量極大嘅高級香檳，佢蘊含清新香氣，散發桃子、杏仁、蜂蜜及花香，入口順滑，餘韻長，並帶有檸檬皮味道，唔少英國酒評家都畀極高分數，難怪大舊石冧到極，一次過大手掃半箱，嚟緊聖誕開party，大可以飲餐勁。
卓妮