行會成員全部都由煲呔曾一手招攬，奉行集體負責制，有鑊一齊孭，所以煲呔曾民望低，其他行會成員嘅民望都唔高得去邊。港大民意研究計劃嘅最新調查顯示，九成行會成員民望都唔合格，唯獨行會召集人夏佳理（Ron）得最高評分，獲五十一點六分，成為民望最高嘅五大行會成員之首。
其餘最高分嘅，就係梁智鴻，最新得分係四十八點一分，較上次調查輕輕升咗零點七分，佢同阿Ron嘅評分，都高過晒煲呔曾，反映市民嘅眼睛係雪亮嘅。至於民望排第三嘅行會成員，就係工聯會會長鄭耀棠，只得四十四分；排第四係劉江華，得四十二點二分，排第五係鄉議局主席劉皇發，只得三十八點六分。
上述五大行會成員都係只得一個人合格，其他成員更加慘不忍睹。所以話，正如今屆區選結果一樣，市民對於邊個做到嘢、邊個做唔到嘢，其實心中有數。