政情：阿季慘敗尋42粉絲謝票
「雖然無諗過贏，但都無諗過咁差！」今屆區議會出選南區海怡西選區嘅季詩傑只取得四十二票，但原來少票有少票好，可以向選民逐一謝票。因為一個支持者嘅鼓勵電話，阿季打算今日下午到海怡尋找曾經投佢票嘅支持者，佢話唔奢望四十二個人成為自己嘅樁腳，但至少「佢哋都曾經支持過我吖！」
話說尋日下午有一個支持者打畀阿季，鼓勵佢落選唔好灰心，於是佢就忽發奇想，諗住利用得票少嘅優勢，逐一向選民謝票。佢尋日喺社交網站facebook話，今日十二點至三點會喺海怡拆宣傳橫額，仲公開呼籲其餘四十一個曾經投過票畀佢嘅支持者同佢相認。
阿季話，原本估計自己最少攞到五百票，所以今次真係輸得好慘，但佢唔會因此而唔蒲頭。痛定思痛，阿季話自己已經夢醒，明白到地區工作做得唔夠好，所以會再度落區重新做好地區工作喎。