政情：金民豪有個反斗家庭
香港迪士尼樂園第一個擴建園區「反斗奇兵大本營」本月中開幕，尋日就畀傳媒率先入去試玩，樂園行政總裁金民豪都出來同大家玩埋一份，佢特別推介全樂園最激嘅「沖天遙控車」，仲誇張到話升到U形軌最高嗰度可以見到維港同中環喎，但記者試完就唔多覺眼，唔知係驚得滯抑或車速太快呢？
問金民豪玩新園區有乜攻略，佢就無厘頭話：「要食咗嘢先至去玩……不過，玩完先至食嘢都得！」其實金民豪為咗個新園區都可謂出盡法寶，話說佢哋為咗令全園上下一心迎接新園區，特別喺八月招募時裝模特兒，着上時裝公司設計嘅反斗服飾影輯造型照做內部宣傳。
呢個構思結果吸引咗七十組演藝人員參加，從中選出八對代表，而金民豪仲帶埋老婆仔女一齊粉墨登場添！睇番張相，金家個個都餅印一樣，金民豪仲特別Gel咗個雞冠頭，一身便服同家人開心彈起，大家都幾乎認唔出係佢。