政情:IT界選委戰七國咁亂

建制派同泛民主派喺資訊科技界(IT界)一直勢均力敵,據聞嚟緊IT界選委戰,目前最少有五張名單參選,建制派會改頭換面以「ICT動力」名義聯票組名單參選,泛民主派亦會派出接近廿人名單「搶灘」,另被指捲入「葛輝事件」嘅互聯網專業協會(iProA)會長鄧淑明則會以個人名義參選,尋求突圍而出。IT界選委戰將處於七國咁亂嘅局面,相信未到最後都未知鹿死誰手。

名額增十席爭崩頭

有份選出下屆特首嘅IT界選委將由二十席增至三十席,建制派同泛民都磨拳擦掌協調名單爭選委席位,其中被業界視為建制派名單嘅ICT動力,尋日率先公布廿四人聯票組合,包括iProA前會長葛珮帆、副會長洪為民、富商邱德根嘅幼子邱達根等。另一邊廂,泛民則會以上屆六人組成嘅「IT呼聲」為基礎,加上從「IT20」歸隊嘅莫乃光及前立法會資訊科技界議員單仲偕等組成接近廿人名單,希望同建制派一較高下。

此外,幾張號稱獨立名單嘅實力亦不容忽視,好似iProA會長鄧淑明計劃首度單人匹馬參選選委,有業界中人估計此舉旨在為親中形象「洗底」,並為明年立法會選舉「試票」。據聞有「電訊魔童」稱號嘅王維基,再次披甲上陣競逐選委嘅機會亦好高;另剛退出民建聯嘅iProA總幹事趙鈺銘,亦密謀以「網民力量」名義組成三人名單參選,相信今次大混戰必定有一番惡鬥。

提提大家,葛珮帆將會參選沙田區議會頌安選區,同婦女參政網絡嘅劉家儀對壘。另單仲偕亦參選灣仔區議會大坑選區,同區參選仲有新民黨黃楚峰、人民力量劉嘉鴻及獨立候選人沈四海。

另外,廠商會尋日選出新一屆副會長,吳永嘉等成功連任副會長,新當選嘅有徐晉暉、吳清煥及吳宏斌三人,由於工業界(二)以廠商會為界別選民,所以一般相信以上新當選嘅領導層,經協調後好大機會自動成為該界別嘅選委。

「Money18免費即秒股票報價網站」現推出8升級功能,財經資訊,實時實發!