行政會議成員查史美倫（Laura）做過中港兩地證監會高官，係金融證券界女強人，綽號「查死你們」，佢早前就以冇時間為理由，辭任大學教育資助委員會主席，但就對金融界念念不忘，保留唔少要職。
其實金融業界一樣好掛住佢，香港證券專業學會上周四就頒授咗今年度榮譽會員資格畀佢，成為首位榜上有名嘅女性，將Laura喺金融界嘅資歷砌得更加完美。難怪Laura幾忙都要抽空現身，接受大家對佢嘅讚美，佢話學會頒授榮譽會員資格畀佢，對佢嘅意義特別重大！
睇番學會成立以來頒授嘅榮譽會員資格，都係行內叻人，包括前港交所主席李業廣、恒生銀行前董事長利國偉、香港證監會前主席梁定邦及港交所前行政總裁周文耀等人。