政情：阿涂添丁 自放三日侍產假
今年已經四十八歲嘅立法會議員涂謹申做咗議員好多年，咩風浪都見過，但尋日正式初為人父，做人老竇，阿涂話估唔到真係會咁緊張，前晚仲成晚瞓唔着。喺油尖旺奧運選區出選嘅阿涂話，呢三日都會全天候陪住老婆，之後先再落區備戰，大條道理掛免戰牌。
涂太約定醫生剖腹產子，涂B尋日搭正下午一點半出世，唔知係咪全球第七十億個人呢？不過肯定嘅係，太太阿SUE今次一索得男，為涂家繼後香燈，涂家上上下下都好興奮，阿涂話以為自己係最緊張嗰個，點知佢媽媽先係最緊張，成晚喺醫院騰出騰入，證明呢個嫲嫲好錫孫仔。
BB重六磅八安士，仲未改名，阿涂話名可以遲啲諗，反而最緊張個仔靚唔靚仔，佢話開頭以為BB係單眼皮，但後尾先睇到係雙眼皮，咁都放心啲。同樣係油尖旺奧運區出選，仲有自由黨劉啟傑同人民力量朱景亮。