政情：范太網頁加入「香港情懷」
一直對參選特首態度諱莫如深嘅全國人大常委范徐麗泰早前聘請公關公司，為佢安排會見傳媒，尋日佢又自爆，話近日喺其個人網頁內加設「香港情懷」部分，務求帶起社會對香港未來發展方向嘅討論。「香港情懷」裏有一句係咁嘅：「不論我將來有沒有機會服務香港市民……讓我們一起來，為建設美好家園而努力！」
劉夢熊話阿爺未有欽點
范太尋日出席講座，為在場約三百老師概談人大常委會工作，有老師發問應否將六四加入國民教育課程，范太不諱言「國家好與唔好的地方都應該了解」，而六四是發生過的事實，故應納入課程。
其餘兩位疑似特首候選人唐英年同梁振英尋日無出席公開活動，表明挺梁嘅全國政協委員劉夢熊，尋日出席一個論壇時斬釘截鐵話，九月尾佢趁住去北京出席活動收風，得到嘅訊息係中央未有欽點邊個做下屆特首。
唔單止咁，佢聲稱人大、政協系統中，唔少「重量級、有代表性、有鐵票」嘅人士，私下都支持佢挺梁嘅做法，只差在無公開表態，遲啲會喺選票上反映出嚟喎。