中環出更：蔡冠深獲嶺大榮譽博士銜
嶺南大學尋日頒授學位，中華總商會會長、新華集團主席蔡冠深（Jonathan）獲頒授榮譽社會科學博士學位，Jonathan當然喜上眉梢，太太蔡關穎琴、媽媽同六位兄弟姊妹全體總動員到賀，場面好溫馨。至於仔女就因為要返學，惟有出席大學搞嘅慶祝晚宴補數。
Jonathan雖然屢獲學術殊榮，表現依然雀躍，佢話個學位係大學同香港各界對佢嘅認同。卓妮問佢點樣教育五個仔女，佢話最重要係「中西結合」，既要傳承中國傳統優良嘅文化，刻苦耐勞，又要吸取西方全球一體化嘅宏觀理念。所以佢先畀仔女喺香港讀書，再送出外國深造，依家大仔就去咗加拿大ＵＢＣ大學進修喇。
同場仲有「造紙大王」理文造紙主席李運強獲頒榮譽工商管理學博士，以及前大學教育資助委員會主席林李翹如獲頒榮譽法學博士。李運強太太、仔女及親家都有嚟捧場，佢話自己當年白手興家，希望年輕人識得把握發展機會，對社會作多啲貢獻。