政情：長毛跛住腳忍痛拉票
平時見立法會議員梁國雄（長毛）喺會議廳鬧庸官嘅時候中氣十足，掟嘢身手又快、狠、準，畀人感覺佢嘅身體都相當健康。區議會選舉在即，社民連尋日舉行巴士巡遊造勢，身為社民連靈魂人物嘅長毛點都要出嚟支持吓，但赫然見到佢隻右腳跛吓跛吓，行得比平時慢幾倍不特止，仲要加埋支拐杖先行到，呢個時候先至要戙拐杖，認真擇使。
問長毛發生咗乜嘢事，佢就好似唔想多講，淨係話係舊患復發，好快就會好番喎。話說尋日社民連架開篷巴士去到各選區時，車上所有成員全部落車為候選人打氣，唯獨長毛就耍手擰頭唔肯落車，話自己坐喺架車上面幫班兄弟嗌咪仲好喎。仲有六日就到區選，參選中西區區議會觀龍選區嘅長毛，如果要同民建聯葉國謙打硬仗，睇嚟佢要快啲好番先至得喇。