中環出更：陳有慶遙距監察泰國水災
近日泰國水患愈來愈嚴重，但喺泰國經營銀行、醫院同米業等大生意嘅亞洲金融集團主席陳有慶就唔多擔心。卓妮幾日前嘅下晝路過中環一間酒店，遇到陳有慶同一名保鏢喺酒店內嘅「民興昌」做衫，一邊度身一邊同裁縫有講有笑，相當輕鬆，一睇就知佢係熟客。
淡定做衫 唔擔心生意
卓妮上前問吓陳有慶有否受泰國水災影響？佢就好淡定話，自己日日都有留意當地嘅情況，暫時影響都唔係好大，因為唔係成個曼谷浸晒，而且嗰邊有姪仔同屋企人睇住盤生意，有乜消息都會第一時間通知佢喎。佢離開咗「民興昌」之後，又入咗隔幾個舖位間David's Shirts公司繼續做衫，似乎心情真係好好咁喎。
講開「民興昌」呢間專為客人度身訂造西服嘅老字號，卓妮記得陳有慶嘅囝囝陳智思都幫襯咗十幾年，原來佢哋兩父子都係忠實擁躉。