中環出更：李文斌開P共賞仁濟盃
沙田馬場尋日好熱鬧，仁濟醫院董事局搞「仁濟盃」，包廂房開Party。主席李文斌（Edmond）人緣佳，多位總理齊出動撐場外，佢爸爸「造紙大王」李運強、哥哥李文俊、李文恩都幫手做啦啦隊，夠晒熱鬧。
澳航停飛勾蜜月回憶
Party筵開廿幾圍，Edmond同太太Amanda滿場飛招呼客人，搞到落注都無時間。講起澳航突然停飛封殺工運，佢話家族生意同澳洲無往來，未受影響。
不過，回想四年前，佢同太太去巴黎度蜜月，就曾遇上當地公共交通工具罷工，想搵架巴士搭吓都難，出入惟有搭的士。
Party上，撞見剛由南非度蜜月返港嘅李文恩，佢同太太十指緊扣，好甜蜜。文恩話，南非之行好刺激，近距離觀賞野生動物獵食，大開眼界。佢不忘炮製驚喜，喺大草原上靜雞雞安排一頓燭光晚餐，十足拍戲咁浪漫。
講番仁濟盃，除副主席嚴徐玉珊一家齊撐場外，仲有總理葉恭正、吳國榮（Michael）、馮卓能等。財星高照嘅Michael，貼中第二場連贏位，袋萬多元彩金，認真肥仔。
卓妮轉頭又遇見莎莎老闆郭少明及「快勞夾大王」杜振源，原來兩人夾份養咗匹團體馬「按得美麗」，尋日初次出戰跑第三，捧走近十四萬元獎金，表現算有交代嘞。
卓妮