政情：田少唔會唔認有外遇
喺政治選舉裏面出現緋聞，令整個選舉更有人性，好多人都會去八卦一下，加把口去評論一番。旅遊發展局主席田北俊（圖）尋日話，講到外遇，唔會有男人會承認自己冇，因為自認無外遇，如果唔係自認魅力唔夠，就係認自己性無能。當然喺太太面前，「招供」程度又作別論。佢呢番說話，完全係以事論事，因為唔見得佢已經加入某人嘅競選團隊，幫手撐場，或者幫手倒米。
由旅發局主辦、喺西九舉行嘅美酒佳餚巡禮尋日開幕，田少當然特別忙，活動喺西九愈搞愈大，嚟趁高興嘅人一年比一年多，佢話明年嘅美酒佳餚巡禮仍然喺西九舉行，後年嘅地點亦已經定咗，就係啟德郵輪碼頭嘅地盤，睇嚟呢個活動專係吼住有維港景嘅大地盤嚟舉辦，不過田少講笑話，政府做嘢咁慢，可能後年都仲可以喺西九搞，一腳就踩晒呢屆同下屆政府添。