政情：討論競爭法擺Greg蘇上枱
立法會尋日開會討論《競爭法條例草案》修訂，商務及經濟發展局局長蘇錦樑（Greg蘇）親身上陣，但就畀人擺上枱玩餐飽。政府「跪低」將有關條例作出多項修訂，已被批評條例變成冇牙老虎，民主黨議員劉慧卿尋日索性質問Greg蘇︰「係咪因為唔夠票，民建聯鍊住你條頸，先搞咁多嘢出嚟？」社民連「長毛」梁國雄更開聲教Greg蘇點做官。
對於卿姐話民建聯鍊住Greg蘇條頸，以達致修訂競爭法，民建聯陳鑑林就即刻反駁話︰「民建聯從來冇鍊住局長條頸，係Ｖ煞先叉頸嘅啫，局長你要講清楚以正視聽！」Greg蘇嗰刻惟有笑騎騎死撐，澄清從來冇人鍊住佢條頸，啲措施依然有效打擊反競爭行為喎。
就喺呢個時候，長毛就同Greg蘇講︰「我教你做官啦！」長毛話當局做咗咁多妥協，大家都係「你哋又唔情願，我哋又唔情願」，不如用民眾反壓嗰啲不知從何而來嘅反對聲音咁話。