政情：棠哥開演唱會晒歌喉
工聯會會長鄭耀棠鍾意唱歌係人都知，據佢身邊嘅人講，棠哥興起嘅時候隨時可以連續唱幾首歌都面不紅、氣不喘，認真犀利。佢下個月廿四日將會粉墨登場，參加建造業慈善演唱會嘅演出，同場仲有歌星許志安表演添。
呢個演唱會目的係為建造業關懷基金籌款，除咗棠哥之外，專業會議立法會議員石禮謙同埋屋宇署署長區載佳當晚都會大唱特唱。棠哥唱得係人都知，不過據講佢最耍家都係唱七、八十年代嘅懷舊金曲，首本名曲係《把根留住》同《莫斯科郊外的夜晚》，有冇新飲歌就唔知嘞。棠哥同許志安嚟個一新一舊對比，諗落都幾有趣。
棠哥係唱得之人，當眾表演當閒事啦，但石禮謙就唔同喇喎，記憶所及都好少聽到佢嘅歌聲，不過唔使怕，淨係睇佢嘅身形已經知道佢中氣十足，到底係咪可以媲美世界級男高音嘅唱工，就真係到時至知嘞。