中環出更：發叔大疊金牛鋪馬場草皮
尋日快活谷馬場舉行賽事，鄉議局主席劉皇發同太太吳妹姝嘅愛駒「龍船快」都有份出賽，可惜愛駒唔爭氣，唔單止三甲不入，仲令到發叔荷包大蒸發添。
話說尋日第四場十二號「龍船快」賠率七點幾倍成為熱門之一，發叔同太太以及新抱現身替愛駒打氣。起跑前，卓妮見發叔企喺廂房露台瞄到實，似乎胸有成竹，勝算十足。忽然，佢喺袋度拎咗一疊金牛出嚟，同新抱交頭接耳，之後就去落注。唔通佢想贏獎金之餘仲另有斬獲？
無幾耐，卓妮見「龍船快」個賠率升到四點五倍，成為第二熱門，同紹榮鋼鐵始創人龐鼎元太太龐熊少珠隻「鋼志」對撼。可惜愛駒起跑快但後勁不繼，一疊金牛就咁鋪咗草皮。
陳正欣拉頭馬遇阻
同日第九場發生咗段小插曲，九號嘅香港木球會團體馬「金獅名將」跑出，保良局總理陳正欣（Daniel）都係馬主之一，本來興高采烈拉頭馬，點知有馬主上訴，搞到要研訊，好彩最後都順利拉到頭馬，Daniel同一班好友即時開心到彈起。