煲呔曾千揀萬揀，揀着民望最低嘅「人肉錄音機」林瑞麟（林D9）接任政務司司長，搞到全城怒吼，網民無處宣洩，惟有改圖洩憤。尋日facebook流傳一幅疑似煲呔曾同林D9嘅床照，當然一望就知道係假㗎啦，但再細讀埋相中兩人嘅對白，真係一矢中的，都咪話唔好笑。
呢幅合成照之中，煲呔曾同林D9喺床上肉帛相見，兩個人含情脈脈地互望對方。其中煲呔曾面帶微笑，壓咗喺林D9身上，佢雙手輕撫着林D9塊面話：「我鍾意你EQ高！」而林D9亦向煲呔曾報以淺笑話：「我鍾意你戇Ｑ高！」兩人嘅對話營造出整張相嘅標題。
雖然呢張合成照有啲意識不良，但佢所表達嘅內容，又的的確確係表達實況。林D9處理替補機制，激發廿二萬人喺七一上街，煲呔曾都仲要搵佢做政務司司長，然後死撐林D9為人謙虛同EQ高，係政務司司長上選，難怪網民要改圖將佢哋兩個惡搞喇。