政情：CY唐唐鬥開期票冧鄉紳
特首選舉已將近入直路，兩位疑似候選人梁振英（CY）同唐英年近日四出拜票，尋求選委及唔同團體嘅支持，尋日兩人又獲邀出席新界鄉議局嘅村代表申訴大會。鄉議局連埋友好嘅特首選委票有逾一百張，所以兩人喺大會上都講盡好話冧鄉紳，而唐唐更開聲贊成研究放寬丁屋嘅高度限制，間接聲援鄉紳反對政府取締村屋僭建博攞分。
鄉議局今年確係多事之秋，好似村屋僭建、私人土地變保育地等，總之樣樣都唔順利，主席劉皇發致開幕詞時話，新界現時民怨愈積愈深，民生問題千瘡百孔，鄉民已經到咗有冤無路訴嘅地步。發叔老人家開到聲，兩位嘉賓又點會唔有求必應呢？唐唐好露骨講到明，政府應該研究放寬丁屋嘅高度限制，釋放土地，增加土地供應，班鄉紳聽到又點會唔開心先？
CY就不甘示弱話，新界將來唔再係香港偏遠地區，而係珠三角地帶嘅中心，即係話將來新界會大力發展。CY又認為，如果私人產權同公眾利益有衝突時，政府應該用合法、合情、合理嘅方法處理，可參考外國嘅經驗成立保育基金解決問題，意味將來因為保育而令土地價值下降，業權人有機會取得賠償，呢番說話同樣冧爆一眾鄉紳。唔少鄉紳都話，兩人各有千秋，暫時唔肯透露邊個係心儀特首人選。
CY去鄉議局之前，原來出席咗非牟利幼兒教育機構議會搞嘅研討會，仲特登早到，聽取議會對香港幼兒教育嘅意見書，佢發言時又大讚幼兒教育工作者敬業樂業，結果亦令到與會人士全部開開心心，相信已經爭取到唔少支持，如果在座有選委嘅話，相信都係會支持佢。
原居民叫煲呔曾落台
講番尋日鄉議局村代表大會，有元朗原居民在場派發傳單，內容係鼓勵所有原居民唔好怕抗爭，不惜走上街都要保衞家園，有原居民仲話，煲呔曾呢個夕陽政府乜都搞唔好，佢哋已經冇晒信心，轉而向下屆政府反映好過，仲寸爆煲呔曾不如盡早落台，唔好阻住地球轉喎。