中環出更：魏聖美合照林健鋒當寶
滙豐銀行早前同聯合國兒童基金會合辦咗個慈善高爾夫球賽，年僅廿二歲嘅美籍韓裔靚女高爾夫球手魏聖美（Michelle Wie）都有現身，搶盡風頭。原來經濟動力立法會議員林健鋒（Jeffrey）當日都有落場打波，仲搵咗Michelle同佢合照添，之後就將幅相當係寶，仲放入iPad內，喺立法會周圍騷畀人睇，笑到見牙唔見眼。
大讚對方好波
慈善高爾夫球賽當日，大家嘅焦點都去咗Cute爆嘅Michelle身上，所以無乜人留意到Jeffrey身處其中，無計啦，靚女總係吸引到大家嘅目光。Jeffrey有幸一睹Michelle喺球場上嘅英姿後，都大讚對方「好波！」但係佢都不甘示弱，話自己當日一樣「表現神勇」。不過，可惜兩人始終冇機會同場較量切磋吓，事關卓妮都想睇吓Jeffrey係咪未打波先暈大浪嘛。
其實Michelle係職業球手，而Jeffrey只係打業餘，可謂強弱懸殊，就算有機會比賽都能預知結果，但如果有幸同咁出色嘅球手較量，相信輸咗都學到嘢嘅。