政情：郭炳湘培養明日世界領袖
新鴻基地產非執行董事郭炳湘（Walter）好關心本港政事，佢成日話，香港回歸後急需培養政治人才，但係政府冇乜動作，佢索性自己掏荷包做大事。Walter決定以年初成立嘅「郭炳湘慈善基金」，與港大合作成立獎學金，下周二將會舉行成立儀式。
呢個獎學金名為「HKU/OXFORD Walter Kwok Schlarships」，每年將贊助兩名港大優秀畢業生，前往英國牛津大學布拉瓦尼克政治學院（Blavatnik School of Government）修讀一年公共政策碩士課程，期間估計超過四萬英鎊（約四十八萬港元）嘅學費和生活費，將由獎學金負責。
今次係Walter以個人名義成立基金後嘅頭炮製作，目的係為香港培養明日世界領袖。呢間政治學院係去年九月牛津斥資十二億港元成立，係歐洲首間旨在培育「明日世界領袖」嘅學院，擺明挑戰哈佛大學，以改變主要國際領袖都出身於美國嘅現象。