政情：立會有間「母乳喂哺室」
立法會新大樓地方夠晒大外，仲加咗好多新設施，包括幼兒護理室、母乳餵哺室、兒童教育室等，將來肯定會多咗兒童出入使用。不過，我哋就發現大堂一個指示牌出現嚴重錯字，就係提供畀啲媽咪餵BB飲奶嘅母乳餵哺室，個「餵」字竟然錯寫成「喂」，變成「母乳喂哺室」，唔通係提示啲媽咪餵奶前要「喂」一聲叫BB夠鐘飲奶？
立法會秘書處發現後，已經火速補鑊，用膠紙貼住寫錯字嘅招牌，然後喺上面寫番個正字。如果一早檢查吓，就避免到呢啲甩漏嘢發生啦！
其實新大樓已經啟用咗一段日子，但至今好多地方都係甩甩漏漏，發現死老鼠唔在講，日前連「會議廳」個招牌，其中「議」字嘅「我」部分都跌咗落嚟，十足「豆腐渣」工程，認真失禮人，歸根究柢都係趕工急就章所致。