中環出更：項明生歐遊投緣收契仔
潮流興玩社交網站，Sony Computer Entertainment香港分公司董事項明生（James）最清楚箇中魅力，事關佢玩盡各個社交網站，就算到世界各地旅遊，都唔會同香港脫節。James啱啱坐水晶郵輪暢遊歐洲十二日返港，尋日現身九龍麗思卡爾頓酒店，為公司推出嘅超強功能手提遊戲機PS Vita發布會撐場。原來James一邊歐遊，一邊用社交網站遙控同事部署今次盛事。
講起今次歐遊旅程，James感到最冧嘅係唔使日日執拾行李、搬酒店，只要安坐喺巨大嘅「移動城堡」郵輪之中，每日朝頭早睜大眼，一個個靚絕嘅地中海名城就送到佢房間嘅露台前，真係開心。今次佢暢遊咗意大利、法國、摩納哥、西班牙及克羅地亞五國，行程美不勝收之餘，仲有個意外嘅收穫，就係榮升「爸爸」喇！
法籍三歲男孩黐到實
大家咪鼓譟住！其實James係收咗一個好得意嘅法籍三歲小男孩做契仔。小豆丁同父母一齊遊船河旅行，但就好有緣分咁全程黐實James，連自己爸爸都唔理，所以大家起哄叫James收佢做契仔。不過，旅程結束前，大家都係要依依不捨分開，雖然係咁，但就為James帶來一個難忘嘅旅程。
卓妮