政情：九倉搞比賽發掘大畫家
近年積極打造藝術商場嘅九龍倉，尋日宣布舉辦全港中學生繪畫比賽，希望激發中學生嘅創意。九龍倉集團執行董事李玉芳（Dorren）話，得獎者唔止有機會喺九龍倉旗下三個人流極旺嘅商場展示佳作，仲有機會到台灣交流，佢希望藉此發掘未來嘅大畫家。
Dorren話，佢細個時都好鍾意繪畫，但係當時環境唔好，冇正式上過繪畫班，笑言自己嘅天分被埋沒咗添！佢好想透過呢個活動，推廣藝術及激發本地中學生嘅創意。九龍倉旗下嘅海港城、時代廣場、荷里活廣場人氣極旺，係鍾意行街Shopping一族嘅勝地，Dorren話，佢哋幾年前開始將藝術品引入商場，希望客人購物時精神亦得到滿足，呢個概念亦將逐漸推廣至集團喺內地嘅商場。
為繪畫比賽擔任評判嘅著名設計師靳埭強、中大藝術系教授陳育強亦現身，同四位因繪畫出色而揚威海外嘅中學生交流，現場展示佢哋嘅佳作，大家對佢哋嘅畫功盛讚不已。