政情：阿涂囝囝叫涂改液？
民主黨立法會議員涂謹申太太臨盆在即，預產期撞正區議會選舉，不過阿涂尋日就話唔理得咁多，強調自己以老婆為先，最近連準備幫太太帶去醫院嘅「走佬袋」都執好晒，隨時候命，一收到電話就會趕去醫院。阿涂仲要一路講、一路拎個電話出嚟睇吓有冇未接來電，緊張得嚟又好開心。
談及同個仔改好名未，阿涂居然話叫「涂（塗）改液」，唔通佢自覺有「缺失」，要用囝囝個名嚟提自己改過？非也，原來佢係講緊《易經》個「易」，係一位小朋友建議佢改嘅，話有為社會同世界帶來改變嘅意思，英文名更可改埋做「Change To」嚟襯番，呢個Gag真係爛到爆。
既然都有「涂改易」，咁不如下個Ｂ改做「涂改帶」啦。點知阿涂搞爛Gag真係有一手，反建議叫「涂帶改」仲好。佢話有啲人為仔女改名，鍾意叫做「帶金」、「帶銀」，希望可以為自己帶來財富，佢個B就要帶來改變喎。希望佢係純粹搞笑博出位喇，如果係講真，個仔大個之後一定嬲死佢！與涂謹申同區參選嘅，仲有自由黨劉啟傑同人民力量朱景亮。