政情：Greg蘇擺款 兩面受敵
《競爭條例草案》前日正式跪低，以商務及經濟發展局局長蘇錦樑（Greg蘇）為首嘅政府官員，決定將呢條條例剝牙，大幅減低條例嘅阻嚇力，講到尾都係想呢條備受爭議嘅法例可以草草通過，等煲呔曾可以將呢項「政績」計入成績表，認真可恥。雖然政府讓步，但商界仍然未十足收貨o架，有建制派人士批評，之前負責推銷呢條法例嘅Greg蘇態度極差，搞到商界好嬲喎。
呢位建制派人士話，當初任副局長嘅Greg蘇向商界解釋呢條法例時，一直喺度擺款，而且敵我不分，對住班親建制派議員同商界代表，表現倨傲，喺同商界談判期間，又始終唔肯講清楚一旦政府讓步，幅度會有幾大，只係不斷重申：「政府依家讓少少，你哋收貨啦！」就係呢種行徑，令一班老闆級代表好不滿，感到好似畀一個芝麻綠豆官脅迫咁，認真冇癮。
其後政府見勢色不妙，迅速將倒米嘅Greg蘇換走，改由商務及經濟發展局常秘黃灝玄頂上繼續推銷呢條法例，雖然最終都係要將條例剝牙，但可以去到呢一步已經算係功不可沒，若果最終可以順利通過埋，咁呢位常秘就名副其實居功至偉喇。不過，建制派人士話，千祈記住Greg蘇冇份o架，呼籲佢千萬唔好走出嚟叨光，以免貽笑大方。
雖然建制派擔心黃灝玄畀人搶功勞，但有官場中人就分析，黃常秘自己未必咁諗，甚至有啲樂觀其成添。點解？無他嘅，因為黃常秘自己一向都唔喜歡問責制，其實官場已經多次傳出，政府有意搵佢做問責局長，只係黃灝玄自己冇興趣入呢個熱廚房，所以先至「委身」做常任秘書長咁話。
泛民強調唔一定贊成
《競爭法》左右不討好，一向支持呢條法例嘅泛民主派議員承認，雖然條法例改到咁，但佢哋仍然好希望條法例可以順利通過，但亦有議員強調唔一定贊成喎。建制派同泛民都講到對條例咁有保留，夠膽嘅咪投反對票囉，又冇人揸住支槍指住你投票嘅！