政情：CY唐唐同場互當透明
疑似特首候選人梁振英（CY）同唐英年相繼辭職後頻頻落區做騷，尋日兩人又同獲邀出席時裝旗艦店開幕禮。不過，兩人前後腳到場，仲各自喺會場內同朋友傾談，兩人近在咫尺，但大家都當對方透明，莫講話全程零交流，連打招呼都唔多覺，之後兩人就喺人群中消失得無影無蹤。
唐英年答問九唔搭八
唐唐尋日早上又去參觀九龍塘東華三院黃笏南中學，唔知唐唐係咪繼「車毀人亡」論後，擔心又再開口夾着脷講錯嘢，以致回答學生提問時「九唔搭八」，相信啲學生都聽到一頭霧水。有學生問佢對九十後嘅睇法、點樣幫學生從政？唐唐就無喇喇話，家長對後生一代有較激嘅言論係出於緊張，又話自己有時可能用詞不當，畀人大做文章，會經一事長一智咁話，似懺悔補鑊多過答問題。
有女學生問佢點樣投放資源畀中學推行藝術發展，點知唐唐就扯咗去西九龍文娛藝術區，話嗰度將有十幾個表演廳，未來藝術發展潛力大喎。又有男學生擔心畢業後搵工難，問政府有冇措施幫年輕人喺外地搵工。唐唐就話外國政府有安排學生去落後地區教英文嘅計劃，搵工前可以擴闊視野，總之全程答非所問，九唔搭八。