政情:立會女議員變晒黃面婆

以前中環舊立法會大樓啲燈光又白又亮,唔少頭髮稀疏嘅男議員都有意見,話照到佢哋個「地中海」立立令,好似「金勞詹」詹培忠就講過話唔係咁好睇。依家立法會已經搬咗去添馬艦,點知又輪到班女議員投訴,話入面嘅燈光好黃,照到人好似黃面婆咁老。連啲攝影記者都話,入面嘅燈光太明亮,影相時議員現晒啲皺紋,真係補幾多粉都遮唔住。

葉劉擔心上鏡更老

其實新立法會大樓會議廳嘅燈光真係幾黃,尋日新民黨主席葉劉淑儀就嘈喇︰「嘩,我見到啲女同事影出嚟啲相個個都黃晒,我都好擔心!」然後又話:「已經老啦,仲要影老啲,真係慘喇!」所以從上鏡角度嚟睇,都係覺得以前舊大樓啲燈光靚啲,緬懷以前啲燈光多啲咁話喎。咁又係,啲燈光太黃影到人嘅面色好似條蕉咁,女士們最怕畀人話似黃面婆,佢哋唔投訴就假喇。

其實除咗一班議員外,就連成日喺立法會出沒嘅攝影記者都投訴過新大樓嘅光暗度,話室內燈光太明亮,啲資深議員現晒皺紋唔在講,最慘係新大樓外嘅示威區同採訪區位置安排,攝記喺採訪區對住啲示威者影相時,成日都背晒光,影到啲相黑孖孖。所以尋日都有攝記同立法會秘書長吳文華(Pauline)反映,希望可以將示威區嘅位置改一改。

除此之外,新大樓都仲有唔少嘢要執漏,好似會議廳外要加多部電視,其中一個會議室要改畀記者用,喺樓梯口貼番啲路線指示圖等。唔講唔知,原來新大樓八樓嘅部分地板因為鋪得唔好,大家行過時有吱吱聲響,前晚要漏夜鋪過,呢項甩漏認真大工程。Pauline尋日同班傳媒朋友交換意見時話,新地方大家都可能未掌握到,會睇下點樣令大家工作得順暢啲咁話。

Money18免費即秒股票報價網站現推出8升級功能,財經資訊,實時實發!