中環出更：港美少女澳洲鋼琴賽摘冠
曾多次喺國際音樂比賽贏得冠軍嘅香港演藝學院鋼琴學生黃蔚然，本月初喺澳洲一個國際鋼琴大賽中奪冠兼獲得蕭邦練習曲最佳演繹獎，成為該項賽事中歷屆最年輕嘅冠軍得主，除獎金二萬澳元（約十六萬港元）外，佢更獲國際演出機會。○五年迄今，蔚然已奪得八個國際賽事嘅獎項，為港爭光。
擊敗60名世界精英
年僅十八歲嘅黃蔚然，就讀演藝學院音樂學士二年級學生，主修鋼琴演奏。本月喺澳洲新南威爾斯美德崗舉行嘅2011 Southern Highlands International Piano Competition中，佢喺十二日內完成四場篩選賽，並喺決賽中演奏蕭邦鋼琴協奏曲1號E小調作品11，技壓全場，擊敗六十名來自世界各地嘅鋼琴精英，奪得冠軍兼蕭邦練習曲最佳演繹獎。
蔚然話，今次係佢成年後首次摘冠，別具意義，亦感謝父母一直以來對佢嘅支持。演藝學院鍵盤樂系主任郭嘉特教授指蔚然嘅演奏風格獨特，係個十分勤奮積極嘅鋼琴手。蔚然過去接受訪問時曾經講過喜愛激昂同輕快嘅音樂，強調音樂係用心而並非用手來演繹，立志將來做一位鋼琴家，希望到外國進修音樂。
卓妮