政情：劉國勳手機勁似遙控器
智能手機幾乎一人有一部，不過喺北區欣盛選區參選嘅新界青年聯會副主席劉國勳就唔係咁諗，到近期仲係用緊部舊款電話，呢部手機個殼已經剝落，驟眼睇同電視遙控器真係有幾分相似，結果拎出嚟用時，就畀班朋友笑佢遙控器當電話，都咪話唔好笑。
劉國勳話，佢身邊嘅人已經轉晒機，為咗工作需要，佢最近終於屈服咗，已經唔使畀人話用遙控打電話喇。劉國勳日日都收到街坊送嘅湯，最勁仲試過一次收三壺添，除湯水外仲有大量生果，真係多到差啲食唔晒。
劉國勳話，每個街坊煲嘅湯都唔一樣，一次過飲晒其實都怕有副作用，不過為免浪費對方一番心意，所以唔理咁多一於全部送晒入肚。日日食好嘢當然會增磅，好彩選舉活動令佢無時間停落嚟。同區參選嘅仲有甄永樂。