政情：傳任財爺 任總笑而不語
中國金融學會執行副會長任志剛支持邊個做特首，一定會令嗰位候選人勝算大增。特首選舉疑似候選人唐英年早前話約見任總，後來改咗期，但就無交代改到幾時，不過任總尋日竟然喺馬場出現喎。
拉頭馬贏51萬元
尋日佢同太太葉小慧十指緊扣入沙田馬場，一貫地風騷，原來為團體馬「飛燕」打氣。首次出賽嘅「飛燕」非池中物，賽前賠率勁熱，最終不負眾望，以大熱姿態勝出第五場，頭馬獎金高達逾五十一萬元，任總腳頭旺，梗係要飛身上前拉頭馬，佢仲發表得獎感受：「隻馬好好，前景好樂觀。」相馬果然有眼光。
定過神後，卓妮問佢點睇特首選情。任總非常醒目，笑騎騎輕拍記者膊頭，來一招「沉默是金」。記者再追問佢係咪下屆財爺。聽見「財爺」兩個字，任總繼續笑，無答，一切盡在不言中嘞。