政情:李嘉誠獲頒卡內基慈善獎

卡內基基金會日前公布二○一一年卡內基慈善獎得主,長實集團主席李嘉誠與外地九個家族及夫婦一同獲獎,而李嘉誠更加係呢個獎項成立十年以來,首位中國人獲此殊榮,真係可喜可賀。有關獎項每兩年頒發一次,目的係表揚與美國鋼鐵業巨子卡內基(Andrew Carnegie)擁有相同理念嘅出色慈善家,以私人財富奉獻社會大眾。

卡內基基金會評審盛讚李嘉誠係一位自學成才嘅企業家,由香港最大塑膠製造商,進身到長實呢個跨國企業及和記黃埔主席,多年來致力培育奉獻文化,於一九八○年成立嘅李嘉誠基金會,到目前為止已經捐出咗超過十六億美元(逾一百二十五億港元)到全球各地唔同嘅公益項目上,係全球捐獻最多嘅慈善基金之一。

今次得獎者仲包括Crown家族、Danforth家族、Fiona與Stanley Druckenmiller夫婦、Fred Kavli、Lauder家族嘅Evelyn與Leonard Lauder夫婦及Jo Carole與Ronald Lauder夫婦、eBay創辦人Pierre Omidyar同夫人Pamela、Pew家族及Pritzker家族。

「Money18免費即秒股票報價網站」現推出8升級功能,財經資訊,實時實發!