尋日喺facebook上面出現咗一個支持疑似特首候選人CY梁振英參選嘅群組，群組名稱用上CY網誌標語「700萬人是一家」之餘，仲有支持CY嘅立法會「五散人」陳茂波（Paul）擔任群組成員，令成件事睇起上嚟疑幻疑真。
CY身邊嘅人話，原來呢個存在咗一段時間嘅群組，唔係CY官方之作，而阿Paul就同群組劃清界線話，佢對呢個群組全不知情，仲好擔心呢個群組有冇做過啲不君子行為，影響埋佢聲譽。立法會旅遊界代表謝偉俊都係群組成員之一，佢笑笑口同我哋講，佢對被人加咗入群組大感困惑，事關佢都無表過態支持邊個。尋晚我哋再上群組一睇，已經唔見咗謝偉俊個名。
其實支持梁營嘅群組，疑幻疑真，暫時睇都唔知佢係流料定係惡搞。facebook都有撐唐英年嘅專頁，但像真度更低。
